అగ్రరాజ్యం 46వ అధ్యక్షుడిగా జో బైడెన్ మరికొద్ది గంటల్లో ప్రమాణస్వీకారం చేయనున్నారు. క్యాపిటల్ భవనంలో జనవరి 6న హింస చెలరేగిన నేపథ్యంలో.. ప్రమాణ స్వీకారంలో ఎలాంటి అవాంఛనీయ ఘటనలు జరగకుండా కనీవిని ఎరుగని రీతిలో భద్రతా ఏర్పాట్లు చేశారు. రాజధాని వాషింగ్టన్ డీసీని బలగాలతో నింపారు. అతివాద శక్తుల నుంచే కాకుండా భద్రతా సిబ్బంది నుంచి కూడా బైడెన్కు ముప్పు పొంచి ఉందనే నిఘావర్గాల సమాచారంతో అధికారులు అప్రమత్తమయ్యారు. ఎఫ్బీఐ సమాచారం మేరకు 12మంది నేషనల్ గార్డ్ సభ్యులను విధుల నుంచి తొలగించారు. వీరిలో ఇద్దరికి అతివాద సంస్థలతో సంబంధాలున్నట్లు గుర్తించారు. వీరు క్యాపిటల్ ఘటనపై అభ్యంతరకర పోస్టులు, ప్రకటనలు చేసినట్లు ధ్రువీకరించారు.
బైడెన్ ప్రమాణస్వీకారోత్సవం దృష్ట్యా క్యాపిటల్ ఘటన అనంతరం వాషింగ్టన్ డీసీలో అత్యయిక స్థితి విధించారు. లాక్డౌన్ అమలు చేస్తున్నారు. ఏకంగా 25వేల బలగాలను రంగంలోకి దించి కట్టుదిట్టమైన భద్రతా ఏర్పాట్లు చేశారు.
అయితే 12మంది నేషనల్ గార్డ్ సభ్యులను తొలగించడంపై సీనియర్ అధికారులు ఎలాంటి అదనపు సమాచారం ఇవ్వలేదు. వారు ఏ అతివాద సంస్థలతో సంబంధాలు కలిగి ఉన్నారనే విషయంపై వివరణ ఇచ్చేందుకు నిరాకరించారు.
నేషనల్ గార్డ్ వేషధారణలో అతివాద శక్తులు దాడులకు పాల్పడే ప్రమాదం ఉందని ఎఫ్బీఐ హెచ్చరించినట్లు లా ఎన్ఫోర్స్మెంట్ అధికారులు తెలిపారు. నిఘా వర్గాలు పరిస్థితిని ఎప్పటికప్పుడు పర్యవేక్షిస్తున్నట్లు పేర్కొన్నారు.
